કર્ણાટકની ગ્રીન એનર્જી મુંબઈ-પુણે પહોંચશે: AESL સતારા ટ્રાન્સમિશન સ્કીમ હેઠળ કરશે વિસ્તરણ
ભારતની સૌથી મોટી ખાનગી ટ્રાન્સમિશન અને વિતરણ કંપની તથા અદાણી ગ્રૂપનો મહત્વનો હિસ્સો ગણાતી અદાણી એનર્જી સોલ્યુશન્સ લિમિટેડ (AESL) એ દેશના ઉર્જા ક્ષેત્રે એક મોટી સિદ્ધિ હાસિલ કરી છે. કંપનીએ કર્ણાટકમાં ઉત્પન્ન થતી નવીનીકરણીય ઉર્જાને મહારાષ્ટ્રના મુખ્ય ઔદ્યોગિક અને શહેરી કેન્દ્રો સુધી સફળતાપૂર્વક પહોંચાડવા માટેનો આશરે રૂ. ૪,૭૦૦ કરોડનો મૂડી ખર્ચ ધરાવતો વિશાળ ટ્રાન્સમિશન પ્રોજેક્ટ જીતી લીધો છે. આ પ્રોજેક્ટ સતારા, પુણે અને મુંબઈ મેટ્રોપોલિટન રિજન (MMR) માં ઝડપથી વિકસી રહેલી પમ્પ્ડ સ્ટોરેજ ઇકોસિસ્ટમને મજબૂત સપોર્ટ પૂરો પાડશે.
TBCB પ્રક્રિયા દ્વારા સૌથી ઓછી બોલી લગાવી મેળવ્યો કોન્ટ્રેક્ટ
“પશ્ચિમ ક્ષેત્રમાં નેટવર્ક વિસ્તરણ યોજના ટુ કેટર ટુ પમ્પ્ડ સ્ટોરેજ પોટેન્શિયલ નજીક સતારા (૪૫૦૦ મેગાવોટ સુધી) – ભાગ A” નામના આ મહત્વકાંક્ષી પ્રોજેક્ટ માટે ટેરિફ આધારિત સ્પર્ધાત્મક બિડિંગ (TBCB) પ્રક્રિયા યોજવામાં આવી હતી. આ હરીફાઈમાં અદાણી એનર્જી સોલ્યુશન્સ લિમિટેડ (AESL) સૌથી નીચી બોલી લગાવનાર (L1) બેંકર તરીકે ઉભરી આવી હતી અને પ્રોજેક્ટ પોતાના નામે કર્યો હતો.
૩૬ મહિનાની અંદર રાષ્ટ્રને સમર્પિત કરાશે ઈન્ફ્રાસ્ટ્રક્ચર
આ પ્રોજેક્ટનું સંચાલન સ્પેશિયલ પર્પઝ વ્હીકલ (SPV) ‘સતારા પાવર ટ્રાન્સમિશન લિમિટેડ’ હેઠળ કરવામાં આવશે. આગામી ૩૬ મહિનાની નિર્ધારિત સમયમર્યાદામાં આ પ્રોજેક્ટ પૂર્ણ કરીને રાષ્ટ્રને સમર્પિત કરવાની યોજના છે. આ નવો કોન્ટ્રેક્ટ મળવા સાથે જ AESL ના પોર્ટફોલિયોમાં ૫૬૨ સર્કિટ કિલોમીટર (ckm) ની નવી ટ્રાન્સમિશન લાઈન ઉમેરાશે અને ૯,૦૦૦ MVA ની ટ્રાન્સફોર્મેશન ક્ષમતામાં વધારો થશે. આ સાથે જ અદાણી એનર્જી સોલ્યુશન્સનું કુલ સંચિત ટ્રાન્સમિશન નેટવર્ક વધીને ૨૯,૭૩૯ સર્કિટ કિલોમીટર અને કુલ ટ્રાન્સફોર્મેશન ક્ષમતા ૧,૪૩,૪૨૫ MVA ના સ્તરે પહોંચી જશે.
મુખ્ય ટેકનિકલ માળખું અને લાઇન વિગતો
પ્રોજેક્ટની મુખ્ય રૂપરેખા અંગે વાત કરીએ તો, તેમાં સતારા ખાતે ૭૬૫/૪૦૦ kV નું અદ્યતન સબસ્ટેશન સ્થાપિત કરવામાં આવશે. આ ઉપરાંત, કોલ્હાપુર અને સતારા વચ્ચે ૭૬૫ kV ની ડબલ-સર્કિટ ટ્રાન્સમિશન લાઈન નાખવામાં આવશે, તેમજ કોલ્હાપુર પૂલિંગ સ્ટેશનને સંલગ્ન આધુનિક ટ્રાન્સમિશન ઈન્ફ્રાસ્ટ્રક્ચર સાથે અપગ્રેડ કરવામાં આવશે. આ વ્યવસ્થાથી દક્ષિણ અને પશ્ચિમ ભારત વચ્ચે વીજળીનો પ્રવાહ વધુ સરળ અને કાર્યક્ષમ બનશે.
સીઈઓ કંદર્પ પટેલનું નિવેદન
પ્રોજેક્ટ જીતવા અંગે ખુશી વ્યક્ત કરતા અદાણી એનર્જી સોલ્યુશન્સ લિમિટેડના સીઈઓ શ્રી કંદર્પ પટેલે જણાવ્યું હતું કે, “પમ્પ્ડ સ્ટોરેજ પ્રોજેક્ટ્સ ભારતના સ્વચ્છ ઉર્જા સંક્રમણ (ક્લીન એનર્જી ટ્રાન્સિશન) માટે અત્યંત મહત્વપૂર્ણ સાબિત થઈ રહ્યા છે. તે વિશાળ પાયે નવીનીકરણીય ઉર્જાને મુખ્ય ગ્રીડમાં એકીકૃત કરવા માટે જરૂરી સ્થિરતા, સુગમતા અને વિશ્વસનીયતા પ્રદાન કરે છે. સતારા ટ્રાન્સમિશન પ્રોજેક્ટ ક્લીન એનર્જી અને ઉર્જા સંગ્રહ બંનેને ટેકો આપવા માટે એક મજબૂત બેકબોન તરીકે કામ કરશે. અમારો ધ્યેય ભવિષ્ય માટે તૈયાર ટ્રાન્સમિશન ઇન્ફ્રાસ્ટ્રક્ચર બનાવવાનો છે જે ભારતના લાંબા ગાળાના ડીકાર્બોનાઇઝેશન લક્ષ્યોને ઝડપી બનાવે.”
૨૦૩૦ નો નોન-અશ્મિભૂત ઉર્જા લક્ષ્યાંક અને AESL ની ભૂમિકા
ભારત સરકારે ૨૦૩૦ સુધીમાં ૫૦૦ ગીગાવોટ (GW) નોન-અશ્મિભૂત (ગ્રીન) ઉર્જા ક્ષમતા સ્થાપિત કરવાનો મજબૂત લક્ષ્યાંક રાખ્યો છે. આ લક્ષ્યને હાંસલ કરવા માટે ટ્રાન્સમિશન નેટવર્ક સૌથી મહત્વપૂર્ણ કરોડરજ્જુ સમાન છે. AESL દેશભરમાં સૌર, પવન અને પમ્પ્ડ સ્ટોરેજ જેવા સંસાધન-સમૃદ્ધ ગ્રીન પોકેટ્સને મુખ્ય ઔદ્યોગિક અને શહેરી લોડ કેન્દ્રો સાથે જોડવા માટે સતત નવી ટ્રાન્સમિશન યોજનાઓ તૈયાર કરી રહી છે.
અદાણી ગ્રૂપનો ભાગ હોવાના નાતે, AESL પાવર ટ્રાન્સમિશન, ડિસ્ટ્રિબ્યુશન, સ્માર્ટ મીટરિંગ અને કૂલિંગ સોલ્યુશન્સમાં અગ્રેસર છે. કંપની હાલમાં મુંબઈ મેટ્રોપોલિટન અને મુન્દ્રા SEZ માં આશરે ૧૩ મિલિયન (૧.૩ કરોડ) ગ્રાહકોને રિટેલ વીજળી પૂરી પાડે છે અને ભારતમાં આધુનિક ઉર્જા તકનીકો રજૂ કરીને પરિવર્તન લાવી રહી છે.
