આંધ્રપ્રદેશના કુર્નૂલમાં ૨૫ વર્ષ માટે થશે વીજ પુરવઠો
ભારતના રિન્યુએબલ એનર્જી ક્ષેત્રની અગ્રણી કંપની રેફેક્સ રિન્યુએબલ્સ એન્ડ ઇન્ફ્રાસ્ટ્રક્ચર લિમિટેડની પેટાકંપની ‘રેફેક્સ ગ્રીન પાવર લિમિટેડ’ (RGPL) એ એક મોટી સફળતા હાંસલ કરી છે. કંપનીએ ભારત સરકાર અને હિમાચલ પ્રદેશ સરકારના સંયુક્ત સાહસ એવા SJVN લિમિટેડ પાસેથી રૂ. ૩.૮૮ પ્રતિ કિલોવોટ-અવર (kWh) ના સ્પર્ધાત્મક ટેરિફ દરે ૮૦ મેગાવોટ (MW) નો પવન ઊર્જા પ્રોજેક્ટ સફળતાપૂર્વક જીતી લીધો છે. આ અંગે સંબંધીત કંપની દ્વારા શેરબજાર અને નિયમનકારી ફાઇલિંગમાં સત્તાવાર જાણકારી આપવામાં આવી છે.
કંપની દ્વારા જારી કરવામાં આવેલી માહિતી અનુસાર, આ પવન ઊર્જા પ્રોજેક્ટ આંધ્રપ્રદેશના કુર્નૂલ જિલ્લામાં સ્થાપિત કરવામાં આવશે. રેફેક્સ ગ્રીન પાવર વિન્ડ પાવર ડેવલપર (WPD) તરીકે આ ૮૦ મેગાવોટ ક્ષમતા ધરાવતા પ્લાન્ટનું નિર્માણ અને સંચાલન કરશે. SJVN લિમિટેડ દ્વારા આ ટેન્ડર માટે તમામ કાનૂની પ્રક્રિયાઓ પૂર્ણ કર્યા બાદ કંપનીને વિધિવત રીતે લેટર ઓફ એવોર્ડ (LoA) એનાયત કરી દેવામાં આવ્યો છે.
ટેરિફનું ગણિત અને અગાઉના ટેન્ડરો સાથે સરખામણી
SJVN દ્વારા નક્કી કરવામાં આવેલો આ રૂ. ૩.૮૮/kWh નો દર ગ્રીન એનર્જી ક્ષેત્ર માટે ખૂબ જ મહત્વપૂર્ણ માનવામાં આવે છે. આ ટેરિફ દર SJVN ના અગાઉના ૬૦૦ મેગાવોટના પવન ટેન્ડર અંતર્ગત ફાળવવામાં આવેલા ૧૭૦ મેગાવોટના પ્રોજેક્ટ્સના રૂ. ૩.૯૯/kWh ના દરો કરતાં નોંધપાત્ર રીતે ઓછો છે. જોકે, SJVN ના ૧,૩૫૦ મેગાવોટના ISTS-કનેક્ટેડ (ઇન્ટર-સ્ટેટ ટ્રાન્સમિશન સિસ્ટમ) પવન ટેન્ડર માટે મળેલા રૂ. ૩.૬૧/kWh ના દર કરતાં આ ભાવ થોડો વધારે છે.
ઉલ્લેખનીય છે કે, SJVN એ અગાઉ તેના ૬૦૦ મેગાવોટના પ્રોજેક્ટ પૈકી માત્ર ૧૭૦ મેગાવોટ ક્ષમતાના જ ઓર્ડર એનાયત કર્યા હતા. જેમાં આદ્યંત એનર્સોલ (દત્તા ઇન્ફ્રા) ને રૂ. ૩.૯૮/kWh ના ભાવે ૭૦ મેગાવોટ અને UPC રિન્યુએબલ્સને રૂ. ૩.૯૯/kWh ના દરે ૧૦૦ મેગાવોટના પ્રોજેક્ટ ફાળવાયા હતા. ભાવ પ્રમાણમાં ઊંચા હોવાના કારણે SJVN એ તે સમયે ૧૭૦ મેગાવોટથી વધુનો ઓર્ડર આપવાનું ટાળ્યું હતું. તેની સરખામણીએ રેફેક્સ સાથેનો રૂ. ૩.૮૮ નો આ કરાર આર્થિક રીતે વધુ વ્યવહારુ માનવામાં આવી રહ્યો છે.
કરારની શરતો અને પ્રોજેક્ટની સમયસીમા
SJVN દ્વારા જારી કરવામાં આવેલા લેટર ઓફ એવોર્ડ (LoA) માં કોઈ એકમ-સમ (Lump-sum) કોન્ટ્રાક્ટ મૂલ્ય કે ચોક્કસ ઓર્ડર રકમનો ઉલ્લેખ કરવામાં આવ્યો નથી. તેના બદલે, આ કરાર સંપૂર્ણપણે ટેરિફ-આધારિત ઉત્પાદન પર નિર્ભર છે. એટલે કે, ૨૫ વર્ષના દીર્ઘકાલીન પાવર પરચેઝ એગ્રીમેન્ટ (PPA) ના સમયગાળા દરમિયાન કંપની દ્વારા જેટલી વાસ્તવિક વીજળી ઉત્પન્ન કરીને સપ્લાય કરવામાં આવશે, તે મુજબ જ ચૂકવણી જમા થશે.
SJVN લિમિટેડ ૨૫ વર્ષની સમયાવધિ માટે પાવર ખરીદી ક્ષમતા સુરક્ષિત કરવા માટે RGPL અથવા તેના સ્પેશિયલ પર્પઝ વ્હીકલ (SPV) સાથે આખરી PPA કરશે. કરાર મુજબ, PPA અમલમાં આવ્યાની તારીખથી લઈને આગામી ૨૪ મહિનાના નિર્ધારિત સમયગાળા (SCSD) ની અંદર રેફેક્સ ગ્રીન પાવરે આ ૮૦ મેગાવોટ ક્ષમતા ધરાવતા પવન પ્રોજેક્ટનું નિર્માણ પૂરું કરીને વીજ પુરવઠો સંપૂર્ણપણે ચાલુ કરવો પડશે. આ પ્રોજેક્ટથી આંધ્રપ્રદેશ અને દેશના પાવર ગ્રીડને સ્વચ્છ અને પુનઃપ્રાપ્ય ઊર્જાનો જથ્થો પ્રાપ્ત થશે.
