પરિણામોની અસર: સાત્વિક ગ્રીનનો શેર તૂટ્યો, પરંતુ ૬.૩૫ GW ની મજબૂત ઓર્ડર બુકથી રાહત
રીન્યુએબલ એનર્જી અને સોલાર મોડ્યુલ ઉત્પાદન ક્ષેત્રની અગ્રણી કંપની સાત્વિક ગ્રીન એનર્જી લિમિટેડે ચાલુ નાણાકીય વર્ષ ૨૭ ના પ્રથમ ક્વાર્ટર (Q1) ના પરિણામો જાહેર કર્યા છે, જે રોકાણકારો માટે નિરાશાજનક રહ્યા છે. શુક્રવાર, ૧૪ ઓગસ્ટના રોજ કંપની દ્વારા જાહેર કરાયેલા નાણાકીય આંકડા અનુસાર, વાર્ષિક ધોરણે કંપનીના ચોખ્ખા નફામાં ૯૫.૩% નો કડાકો નોંધાયો છે. પરિણામોની સીધી નકારાત્મક અસર શેરબજાર પર જોવા મળી હતી અને બીએસઈ (BSE) પર કંપનીનો શેર ₹૧૫.૧૫ અથવા ૩.૪૩% ઘટીને ₹૪૨૬.૭૫ ની સપાટીએ બંધ રહ્યો હતો.
આવક અને ઈબિટા (EBITDA) માં મોટું ધોવાણ
નાણાકીય વર્ષ ૨૭ ના પ્રથમ ક્વાર્ટરમાં સાત્વિક ગ્રીન એનર્જીનો ચોખ્ખો નફો ઘટીને માત્ર ₹૫.૫૧ કરોડ નોંધાયો છે, જે એક વર્ષ અગાઉના સમાન ક્વાર્ટરમાં ₹૧૧૬.૬૦ કરોડ હતો. કંપનીની કામગીરીમાંથી થતી આવકમાં પણ વાર્ષિક ધોરણે ૪૪.૨% નો ઘટાડો થયો છે. ગયા વર્ષના પ્રથમ ક્વાર્ટરમાં ₹૯૧૫.૭૩ કરોડની સરખામણીએ આ વર્ષે આવક ઘટીને ₹૫૧૧.૦૧ કરોડ રહી ગઈ છે.
વ્યાજ, કર, ઘસારો અને ઋણમુક્તિ પહેલાંની કમાણી એટલે કે ઈબિટા (EBITDA) ₹૧૭૩.૬ર કરોડથી ૮૦.૫% ઘટીને ₹૩૩.૮૩ કરોડ થઈ ગઈ છે. આ જ કારણસર કંપનીનું ઈબિટા માર્જિન, જે નાણાકીય વર્ષ ૨૬ ના પ્રથમ ક્વાર્ટરમાં ૧૯% ના મજબૂત સ્તરે હતું, તે ઘટીને આ ક્વાર્ટરમાં ૬.૬% ના તળિયે પહોંચી ગયું છે.
૬.૩૫ GW ની ભરાવદાર ઓર્ડર બુક અને વિસ્તરણ યોજનાઓ
આર્થિક પરિણામો નબળા રહ્યા હોવા છતાં, કંપનીના ભવિષ્યના દૃષ્ટિકોણ માટે તેની ઓર્ડર બુક અત્યંત મજબૂત સ્થિતિ દર્શાવે છે. સાત્વિક ગ્રીન એનર્જી પાસે હાલમાં આશરે ૬.૩૫ GW ની પુષ્ટિ થયેલ ઓર્ડર બુક છે, જે તેની ૪.૮ GW ની હાલની ઓપરેશનલ મોડ્યુલ ઉત્પાદન ક્ષમતાના લગભગ ૧૩૨% જેટલી છે. કંપનીએ સ્પષ્ટ કર્યું છે કે આ પડકારજનક સમયગાળા દરમિયાન પણ તેને સતત નવા ઓર્ડરો મળી રહ્યા છે, જે ભવિષ્યમાં વ્યવસાયિક સ્થિરતા અને વૃદ્ધિની ખાતરી આપે છે.
નાણાકીય મંદી વચ્ચે પણ કંપનીએ તેના ઉત્પાદન ક્ષમતાના વિસ્તરણ અને વેલ્યુ-ચેઈન ઈન્ટિગ્રેશન પરનું ધ્યાન હટાવ્યું નથી. ઓડિશાના ગોપાલપુર ખાતે આવેલી તેની સંકલિત ઉત્પાદન સુવિધા ખાતે ૨.૪ GW સેલ ઉત્પાદન લાઈન ટૂંક સમયમાં ઉત્પાદન વધારવાનું (રેમ્પ-અપ) શરૂ કરશે. આ સાથે, ALMM-II નિરીક્ષણ સપ્ટેમ્બર મહિના માટે આયોજિત કરવામાં આવ્યું છે. જ્યારે ૪ GW મોડ્યુલ ઉત્પાદન લાઈન ઓગસ્ટના અંત સુધીમાં તેનું ઉત્પાદન વધારવાની પ્રક્રિયા શરૂ કરી દેશે.
૩ તબક્કામાં ફેક્ટરીનો મોટો રોડમેપ
કંપની ભવિષ્યની જરૂરિયાતોને પહોંચી વળવા માટે ત્રણ તબક્કામાં મજબૂત વિસ્તરણ કરી રહી છે:
-
ફેઝ I: ગોપાલપુર ખાતે સેલ અને મોડ્યુલ લાઈનોને કાર્યરત કરવી અને ALMM માન્યતા મેળવવી.
-
ફેઝ II: આ તબક્કા હેઠળ કંપની ૩.૬ GW વધારાની સેલ ઉત્પાદન ક્ષમતા ઉમેરશે, જેનાથી તેની કુલ સેલ ઉત્પાદન ક્ષમતા વધીને ૬ GW થઈ જશે. આ સાઈટ પરની પ્રવૃત્તિઓ Q2 FY27 ના અંત સુધીમાં શરૂ કરવામાં આવશે અને FY28 સુધીમાં તેને પૂર્ણ કરવાનો લક્ષ્યાંક છે.
-
ફેઝ III: કંપનીએ ત્રીજા તબક્કા માટે પણ રોડમેપ તૈયાર કરી લીધો છે, જેમાં ૬ GW ઈન્ગોટ અને વેફર ઉત્પાદન ક્ષમતા સ્થાપિત કરવાની યોજના છે. આ તબક્કો FY29 સુધીમાં પૂર્ણ થશે, જે સરકારના ALMM-III ના આગામી સંક્રમણ નિયમો સાથે સુસંગત રહેશે.
