૨૦૩૨ સુધીનું અસલી ગણિત! ઓલા અને એક્સિસ એનર્જીના આ પ્લાનથી ઉર્જા ક્ષેત્રે આવશે ક્રાંતિ
ભારતમાં ઇલેક્ટ્રિક વાહન ઉત્પાદક ક્ષેત્રે અગ્રેસર ઓલા ઇલેક્ટ્રિક મોબિલિટી લિમિટેડ (Ola Electric Mobility Limited) એ હવે રિન્યુએબલ એનર્જી ક્ષેત્રે પણ પગપેસારો કરતા મોટો ધમાકો કર્યો છે. ઓલા ઇલેક્ટ્રિકે પુનઃપ્રાપ્ય ઊર્જા ક્ષેત્રે કામ કરતી જાણીતી કંપની એક્સિસ એનર્જી (Axis Energy) સાથે એક સમજૂતી કરાર (MoU) પર હસ્તાક્ષર કર્યા છે. આ કરાર હેઠળ બંને કંપનીઓ વર્ષ ૨૦૩૨ સુધીમાં ૨૦ ગીગાવોટ અવર (GWh) સુધીની બેટરી એનર્જી સ્ટોરેજ સિસ્ટમ્સ (BESS) ના ઉપયોગની શક્યતાઓ તપાસશે.
આ ભાગીદારી ઓલા ઇલેક્ટ્રિક પ્લેટફોર્મ ‘ઓલા મહાશક્તિ’ (Ola Mahashakti) માટેનો પ્રથમ સૌથી મોટો કોમર્શિયલ કરાર છે. કંપનીની આ નવી પહેલ ભારતના ઊર્જા ક્ષેત્રે મોટો ફેરફાર લાવશે તેવું માનવામાં આવી રહ્યું છે.
૧૫ ઓગસ્ટે લોન્ચ થશે ‘ઓલા મહાશક્તિ’ પ્લેટફોર્મ
ઓલા ઇલેક્ટ્રિકનું ‘મહાશક્તિ’ પ્લેટફોર્મ વાણિજ્યિક (Commercial), ઔદ્યોગિક (Industrial) અને યુટિલિટી-સ્કેલ એપ્લિકેશન્સ માટે ખાસ ડિઝાઇન કરવામાં આવેલી એક બેટરી એનર્જી સ્ટોરેજ સિસ્ટમ છે. આ પ્લેટફોર્મ સત્તાવાર રીતે ૧૫ ઓગસ્ટના રોજ લોન્ચ થવા જઈ રહ્યું છે.
ઓલા ઇલેક્ટ્રિકે જણાવ્યું કે, લોન્ચિંગ પહેલા જ એક્સિસ એનર્જી સાથે થયેલો આ કરાર દર્શાવે છે કે બજારમાં આ પ્રોડક્ટ માટે કેટલી બહોળી માગ છે. આ કરાર સાથે જ યુટિલિટી-સ્કેલ એનર્જી સ્ટોરેજ હવે ઓલાના બિઝનેસ માટે એક મુખ્ય ગ્રોથ સેક્ટર તરીકે ઉભરી આવ્યું છે.
એક્સિસ એનર્જીનો મોટો ગ્રીન એનર્જી પ્લાન
એક્સિસ એનર્જી હાલમાં ભારતમાં સ્ટોરેજ આધારિત રિન્યુએબલ એનર્જી પ્રોજેક્ટ્સની સૌથી મોટી પાઇપલાઇન વિકસાવી રહી છે. કંપનીએ આંધ્રપ્રદેશ અને રાજસ્થાન જેવા રાજ્યોમાં ૩,૭૫૦ મેગાવોટ (MW) થી વધુ ક્ષમતા ધરાવતા પ્રોજેક્ટ્સ માટે ગ્રીડ મંજૂરીઓ મેળવી લીધી છે, જ્યારે અન્ય ૩,૫૦૦ MW ક્ષમતાના પ્રોજેક્ટ્સ હાલ પ્રક્રિયા હેઠળ છે.
આ પ્રોજેક્ટ્સમાં ફર્મ એન્ડ ડિસ્પેચેબલ રિન્યુએબલ એનર્જી (FDRE), હાઇબ્રિડ સિસ્ટમ્સ અને અન્ય રિન્યુએબલ એનર્જી સેટઅપ સામેલ છે. અવિરત અને સતત (24×7) ક્લીન પાવર સપ્લાય પૂરો પાડવા, ગ્રીડની સ્થિરતા સુધારવા અને સ્વચ્છ ઊર્જાને સિસ્ટમમાં યોગ્ય રીતે સંકલિત કરવા માટે મોટા પાયે બેટરી સ્ટોરેજ સિસ્ટમની જરૂર પડશે.
૨૦૩૨ સુધીમાં ભારતને ૪૦૦ GWh સ્ટોરેજની જરૂર પડશે
ભારતમાં ઝડપથી થઈ રહેલા ગ્રીન એનર્જી ટ્રાન્ઝિશન અંગે વાત કરતા ઓલા ઇલેક્ટ્રિકે સેન્ટ્રલ ઇલેક્ટ્રિસિટી ઓથોરિટી (CEA) ના અંદાજનો ઉલ્લેખ કર્યો હતો. CEA ના અહેવાલ મુજબ, ભારતને વર્ષ ૨૦૩૨ સુધીમાં ૪૦૦ GWh કરતાં વધુ એનર્જી સ્ટોરેજ ક્ષમતાની જરૂર પડશે.
ઓલાના જણાવ્યા અનુસાર, ‘મહાશક્તિ’ પ્લેટફોર્મને સંપૂર્ણપણે ભારતમાં જ ડિઝાઇન અને ઉત્પાદિત કરવામાં આવ્યું છે. આ પ્લેટફોર્મ રિન્યુએબલ એનર્જી ઇન્ટિગ્રેશન, ઇન્ડસ્ટ્રિયલ પાવર, ગ્રીડ ઇન્ફ્રાસ્ટ્રક્ચર અને ડેટા સેન્ટર્સની વધતી જતી વીજ જરૂરિયાતોને પૂરી કરવા માટે સંપૂર્ણ રીતે સજ્જ છે.
મેડ ઇન ઇન્ડિયા અને વર્ટિકલી ઇન્ટિગ્રેટેડ મોડલ
ઓલા ઇલેક્ટ્રિકનું કહેવું છે કે મહાશક્તિ પ્લેટફોર્મ ‘વર્ટિકલી ઇન્ટિગ્રેટેડ’ અભિગમ પર આધારિત છે. જેમાં બેટરી સેલ ટેકનોલોજી, સ્થાનિક મેન્યુફેક્ચરિંગ અને સિસ્ટમ એન્જિનિયરિંગનો સમાવેશ થાય છે.
આ મોડલનો મુખ્ય હેતુ સિસ્ટમની સુરક્ષા અને કાર્યક્ષમતા વધારવાનો, સપ્લાય ચેઇનને મજબૂત કરવાનો અને ગ્રાહકો માટે ‘ટોટલ કોસ્ટ ઓફ ઓનરશિપ’ (TCO) એટલે કે લાંબા ગાળાનો ખર્ચ ઘટાડવાનો છે. સ્વદેશી ટેકનોલોજી હોવાને કારણે તે વિદેશી સપ્લાયર્સ પરની નિર્ભરતા પણ ઓછી કરશે.
કંપનીના વડાઓનું શું કહેવું છે?
એક્સિસ એનર્જી વેન્ચર્સના ચેરમેન અને મેનેજિંગ ડિરેક્ટર રવિ કુમાર રેડ્ડી કટારુએ જણાવ્યું હતું કે, “અમારા રિન્યુએબલ એનર્જી પોર્ટફોલિયોને વિસ્તારવા અને ચોવીસે કલાક ગ્રાહકોને ભરોસાપાત્ર સ્વચ્છ વીજળી આપવા માટે બેટરી એનર્જી સ્ટોરેજ ખૂબ જ મહત્વપૂર્ણ સાબિત થશે. ઓલા સાથેનો આ કરાર અમારા ભવિષ્યના પ્રોજેક્ટ્સ માટે સ્વદેશી બેટરી સ્ટોરેજ સોલ્યુશન્સ અપનાવવાની દિશામાં એક મોટું અને મહત્વનું પગલું છે.”
બીજી તરફ, ઓલા ઇલેક્ટ્રિકના ચેરમેન અને મેનેજિંગ ડિરેક્ટર ભાવિશ અગ્રવાલે ખુશી વ્યક્ત કરતા કહ્યું હતું કે, “એક્સિસ એનર્જી સાથેની આ ભાગીદારી મહાશક્તિ પ્લેટફોર્મની વ્યવસાયિક ક્ષમતા સાબિત કરે છે. તે દર્શાવે છે કે ઉદ્યોગ જગતમાં ભારતમાં જ વિકસાવાયેલા બેટરી સ્ટોરેજ સોલ્યુશન્સ પ્રત્યે રસ વધી રહ્યો છે. ભારત જ્યારે ઊર્જા સંગ્રહના ક્ષેત્રે આગળ વધી રહ્યું છે ત્યારે આ કરાર લાંબા ગાળાની ભાગીદારી બનાવવાની અમારી વ્યૂહરચનાને વધુ મજબૂત કરે છે.”
ભારતના ક્લીન એનર્જી ફ્યુચર માટે નવો યુગ
ઓલા અને એક્સિસ એનર્જી વચ્ચેનો આ કરાર માત્ર બે કંપનીઓ પૂરતો સીમિત નથી, પરંતુ ભારતના ક્લીન એનર્જી ફ્યુચર માટે એક સીમાચિહ્નરૂપ સાબિત થઈ શકે છે. જેમ જેમ પવન અને સૌર ઊર્જાનું ઉત્પાદન વધી રહ્યું છે, તેમ તેમ તે વીજળીને સાચવી રાખવા માટે સ્ટોરેજ સિસ્ટમ અનિવાર્ય બની ગઈ છે. ભારતીય બ્રાન્ડ્સ દ્વારા જ દેશમાં આવા મોટા સ્ટોરેજ સોલ્યુશન્સ તૈયાર થવાથી ભારત ઉર્જા ક્ષેત્રે વધુ આત્મનિર્ભર બનશે.
