તમિલનાડુમાં ૧૦૦ MW સોલાર પ્રોજેક્ટ સાથે ટાટા પાવરે રચ્યો ઈતિહાસ: કાર્યકારી ક્ષમતા ૭ GW પાર, યુટિલિટી પોર્ટફોલિયો ૧૨.૩ GW થયો
ભારતની અગ્રણી અને દેશની વિશ્વાસપાત્ર નવીનીકરણીય ઊર્જા કંપનીઓમાં સ્થાન ધરાવતી ‘ટાટા પાવર રિન્યુએબલ એનર્જી લિમિટેડ’ (TPREL) એ ક્લીન એનર્જી ક્ષેત્રે એક મોટી સિદ્ધિ હાંસલ કરી છે. કંપનીએ તમિલનાડુના કાયથર વિસ્તારમાં આવેલા વેલ્લાલનકોટ્ટાઈ અને નાલંધુલા ગામો ખાતે પોતાનો ૧૦૦ મેગાવોટ (MW) નો ગ્રુપ કેપ્ટિવ સોલાર પ્રોજેક્ટ (TNGC-2) સફળતાપૂર્વક કાર્યરત (કમિશન) કરી દીધો છે.
આ નવા પ્રોજેક્ટના પ્રારંભ સાથે જ TPREL નો કુલ યુટિલિટી પોર્ટફોલિયો વધીને ૧૨.૩ ગીગાવોટ (GW) ના સ્તરે પહોંચી ગયો છે. આ સાથે જ કંપનીએ ૭ GW ઓપરેશનલ (કાર્યકારી) ક્ષમતાનો અતિ મહત્વનો સીમાચિહ્ન વટાવીને ભારતના ગ્રીન એનર્જી સંક્રમણમાં પોતાની અગ્રણી સ્થિતિ વધુ મજબૂત બનાવી દીધી છે.
ટાટા ગ્રુપની વિવિધ કંપનીઓને મળશે સ્વચ્છ વીજળી
આ પ્રોજેક્ટ ટાટા ગ્રુપના ડીકાર્બોનાઇઝેશન (કાર્બન ઉત્સર્જન ઘટાડવાના) લક્ષ્યોને આગળ ધપાવવામાં મુખ્ય ભૂમિકા ભજવશે. આ ૧૦૦ MW પ્રોજેક્ટમાંથી ઉત્પન્ન થનારી સ્વચ્છ વીજળી ટાટા ગ્રુપની વિવિધ શાખાઓને પૂરી પાડવામાં આવશે:
-
ટીપી સોલાર લિમિટેડ: ૪૦.૬૨૫ MW (ઉચ્ચ-કાર્યક્ષમતાવાળા સોલાર સેલ ઉત્પાદન)
-
ટાટા ઇલેક્ટ્રોનિક્સ પ્રાઇવેટ લિમિટેડ: ૫૩.૧૨૫ MW (સેમિકન્ડક્ટર અને પ્રિસિઝન એન્જિનિયરિંગ)
-
ટાટા રિયલ્ટી એન્ડ ઇન્ફ્રાસ્ટ્રક્ચર લિમિટેડ: ૬.૨૫ MW (રિયલ એસ્ટેટ અને ઈન્ફ્રાસ્ટ્રક્ચર)
આ સંયુક્ત પહેલથી ટાટા સમૂહની ટકાઉ કામગીરી પ્રત્યેની પ્રતિબદ્ધતા વધુ દ્રઢ બની છે. આ પ્રોજેક્ટ દ્વારા વાર્ષિક આશરે ૨૪૦.૬૩ મિલિયન યુનિટ (MUs) ગ્રીન વીજળી ઉત્પન્ન થશે, જેનાથી દર વર્ષે ૧.૫ લાખ ટન કાર્બન ડાયોક્સાઈડ (CO₂) ઉત્સર્જન ઓછું કરવામાં મદદ મળશે.
ભારતમાં પ્રથમ વખત FTC સિંગલ એક્સિસ ટ્રેકર ટેકનોલોજીનો ઉપયોગ
એન્જિનિયરિંગ અને આધુનિક ટેકનોલોજીની દ્રષ્ટિએ આ સોલાર પ્લાન્ટ અત્યંત ખાસ છે. આ પ્રોજેક્ટમાં ભારતની અંદર પ્રથમ વખત ‘ફ્લેક્સિબલ ટેરેન કોમ્પેટિબલ’ (FTC) સિંગલ એક્સિસ ટ્રેકર ટેકનોલોજીનો ઉપયોગ કરવામાં આવ્યો છે.
આ પ્લાન્ટમાં ૨,૬૧,૬૬૦ જેટલા અત્યાધુનિક મોનો PERC બાયફેસિયલ (બંને બાજુથી વીજળી ઉત્પન્ન કરતાં) સોલાર મોડ્યુલ્સ લગાવાયા છે. આ ટેકનોલોજી વિષમ ભૌગોલિક પરિસ્થિતિઓમાં પણ સૂર્યપ્રકાશનો મહત્તમ ઉપયોગ કરીને મહત્તમ ઊર્જા ઉત્પન્ન કરવા માટે સક્ષમ છે. પ્લાન્ટમાં ઉત્પન્ન થયેલી વીજળી કાયથરના ૪૦૦ kV ગ્રીડ સબસ્ટેશન (GSS) દ્વારા સિસ્ટમમાં ટ્રાન્સમિટ કરવામાં આવશે.
મજબૂત ઓપરેશનલ ક્ષમતા અને આગામી રોડમેપ
કંપનીની હાલની ૭ GW કાર્યકારી ક્ષમતામાં ૫.૭ GW સૌર ઊર્જા અને ૧.૩ GW પવન ઊર્જા (વિન્ડ એનર્જી) નો સમાવેશ થાય છે. ભવિષ્યની યોજનાઓ અંગે વાત કરીએ તો TPREL પાસે આગામી ૬ થી ૨૪ મહિનામાં કાર્યરત થાય તે રીતે ૫.૩ GW ની નવી પાઇપલાઇન તૈયાર છે. આ પાઇપલાઇનમાં ૨.૨ GW સોલાર અને ૩.૧ GW વિન્ડ પ્રોજેક્ટ્સનો સમાવેશ થાય છે.
આ સિદ્ધિ ભારત સરકારના ૨૦૩૦ સુધીમાં ૫૦૦ GW બિન-અશ્મિભૂત ઇંધણ ક્ષમતા પ્રાપ્ત કરવાના રાષ્ટ્રીય લક્ષ્યને મોટો સપોર્ટ પૂરો પાડે છે.
ટાટા પાવરનો વિશાળ બિઝનેસ સમુદાય
ઉલ્લેખનીય છે કે, ટાટા પાવર કંપની લિમિટેડની કુલ કાર્યકારી અને બાંધકામ હેઠળની ઉત્પાદન ક્ષમતા ૨૬ GW ને વટાવી ગઈ છે, જેમાં ૧૭.૭ GW ગ્રીન એનર્જી અને ૮.૮ GW થર્મલ એનર્જીનો સમાવેશ થાય છે.
કંપની પાસે ૭,૮૦૦ સર્કિટ કિલોમીટરથી વધુની ટ્રાન્સમિશન લાઈનો છે અને દેશભરમાં ૧૩ મિલિયન (૧.૩ કરોડ) થી વધુ ગ્રાહકો સાથે તે ભારતની સૌથી મોટી ખાનગી વીજ વિતરણ કંપની છે. આ ઉપરાંત, કંપનીએ ૪.૯ GW ક્ષમતાનો સોલાર સેલ ઉત્પાદન પ્લાન્ટ, ૨.૮ GW પમ્પ્ડ હાઇડ્રો સ્ટોરેજ કરાર અને દેશના ૭૧૭ શહેરોમાં ૭,૦૦૦ થી વધુ જાહેર EV ચાર્જિંગ પોઈન્ટ્સ સ્થાપિત કર્યા છે. કંપની ૨૦૪૫ સુધીમાં સંપૂર્ણપણે ‘નેટ ઝીરો’ બનવાનું લક્ષ્ય ધરાવે છે.
