ગ્રીન એનર્જી સેક્ટરમાં નવો આઈપીઓ: આઇનોક્સ ક્લીન એનર્જી લાવશે રૂ. ૮,૦૦૦ કરોડનો ફ્રેશ ઇશ્યૂ

રિન્યુએબલ એનર્જી ક્ષેત્રની અગ્રણી આઇનોક્સ ક્લીન એનર્જી રૂ. ૧૦,૦૦૦ કરોડના મેગા IPO માટે ડ્રાફ્ટ પેપર્સ ફાઇલ કર્યા

ગ્રીન એનર્જી અને ક્લીન ટેકનોલોજી ક્ષેત્રે દેશની અગ્રણી કંપનીઓમાં સ્થાન ધરાવતી આઇનોક્સ ક્લીન એનર્જીએ પોતાના વ્યવસાયિક વિસ્તરણ અને નાણાકીય માળખાને મજબૂત કરવા માટે શેરબજારમાં પ્રવેશવાની સત્તાવાર તૈયારીઓ શરૂ કરી દીધી છે. INOXGFL ગ્રુપનો હિસ્સો ધરાવતી અને ગુજરાતમાં સ્થાપિત આઇનોક્સ ક્લીન એનર્જીએ મૂડી બજારના નિયામક સેબી (SEBI) સમક્ષ ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કર્યું છે. આ પ્રારંભિક જાહેર ઓફર (IPO) દ્વારા કંપની કુલ રૂ. ૧૦,૦૦૦ કરોડ એકત્ર કરવાની યોજના ધરાવે છે.

કંપની દ્વારા ફાઇલ કરવામાં આવેલા DRHP મુજબ, આ મેગા આઈપીઓમાં રૂ. ૮,૦૦૦ કરોડના નવા ઇક્વિટી શેર (ફ્રેશ ઇશ્યૂ) જારી કરવામાં આવશે. જ્યારે કંપનીના પ્રમોટર દેવાંશ જૈન ઓફર-ફોર-સેલ (OFS) રૂટ દ્વારા પોતાના રૂ. ૨,૦૦૦ કરોડ સુધીના શેર વેચશે.

પ્રી-IPO પ્લેસમેન્ટ અને ભંડોળ એકત્ર કરવાની યોજના

જાહેર ભંડોળ એકત્ર કરવાની પ્રક્રિયા પહેલા કંપની રૂ. ૧,૬૦૦ કરોડ સુધીના શેર ઇશ્યૂ કરવા માટે પ્રી-IPO પ્લેસમેન્ટ લાવવા અંગે પણ વિચારણા કરી રહી છે. જો કંપની રજિસ્ટ્રાર ઓફ કંપનીઝ (RoC) પાસે આખરી રેડ હેરિંગ પ્રોસ્પેક્ટસ ફાઇલ કરતા પહેલા આ પ્લેસમેન્ટ દ્વારા નાણાં મેળવવામાં સફળ રહે છે, તો આઈપીઓ હેઠળ લાવવામાં આવનારા ફ્રેશ ઇશ્યૂના કદમાં તેટલા પ્રમાણમાં ઘટાડો કરવામાં આવશે.

કંપનીનું બિઝનેસ મોડેલ અને ગ્લોબલ પ્રેઝન્સ

આઇનોક્સ ક્લીન એનર્જી મુખ્યત્વે બે પ્રમુખ વર્ટિકલ્સમાં પોતાનો વ્યવસાય ચલાવે છે, જેમાં નવીનીકરણીય ઊર્જા ઉત્પાદન અને સોલાર મેન્યુફેક્ચરિંગનો સમાવેશ થાય છે.

પ્રથમ વર્ટિકલ હેઠળ કંપની એક સ્વતંત્ર વીજ ઉત્પાદક (IPP) તરીકે ભારત અને આફ્રિકાના બજારોમાં સક્રિય છે. કંપનીનો કુલ રિન્યુએબલ IPP પોર્ટફોલિયો ૯.૨૯ ગીગાવોટ (GW) નો છે. જેમાં ઓગસ્ટ ૨૦૨૬ સુધીના આંકડા મુજબ ૨.૩૭ ગીગાવોટ ક્ષમતા પૂર્ણપણે કાર્યરત છે, ૦.૮૦ ગીગાવોટ ક્ષમતાનું નિર્માણ કાર્ય ચાલુ છે, ૨.૯૯ ગીગાવોટ પાઇપલાઇનમાં છે અને બાકીની ૩.૧૩ ગીગાવોટ ભવિષ્યની વિસ્તરણ યોજનાનો ભાગ છે.

બીજા વર્ટિકલ સોલાર મેન્યુફેક્ચરિંગ હેઠળ કંપની સોલાર ફોટોવોલ્ટેઇક (PV) મોડ્યુલ્સનું ઉત્પાદન કરે છે. ભારત અને યુનાઇટેડ સ્ટેટ્સમાં મળીને કંપની પાસે ૬.૦૦ ગીગાવોટની ઓપરેશનલ સોલાર સેલ ઉત્પાદન ક્ષમતા ઉપલબ્ધ છે. આ સિવાય ઓડિશામાં ૫.૦૦ ગીગાવોટની નવી સોલાર મોડ્યુલ મેન્યુફેક્ચરિંગ લાઇન તથા ભારત અને યુએસમાં આશરે ૮.૦૦ ગીગાવોટની વધારાની સોલાર સેલ ક્ષમતા નિર્માણાધીન તબક્કામાં છે.

કંપની ભારતમાં આઇનોક્સ નીઓ એનર્જી દ્વારા અને આફ્રિકામાં સ્કાયપાવર સર્વિસીસ મેના દ્વારા પોતાનો પાવર ઉત્પાદન બિઝનેસ ચલાવે છે. જ્યારે સોલાર મેન્યુફેક્ચરિંગનું સંચાલન ભારતમાં આઇનોક્સ સોલાર અને યુએસમાં આઇનોક્સ સોલાર અમેરિકા LLC દ્વારા કરવામાં આવે છે.

IPO નો મુખ્ય ઉદ્દેશ્ય અને નાણાકીય સ્થિતિ

આ જાહેર ભરણામાંથી મળનારી ચોખ્ખી રકમનો ઉપયોગ કંપની પોતાના નાણાકીય બોજને હળવો કરવા માટે કરશે. ફ્રેશ ઇશ્યૂની આવકમાંથી રૂ. ૬,૦૦૦ કરોડની મોટી રકમનો ઉપયોગ કંપનીના હાલના દેવાની ચુકવણી માટે કરવામાં આવશે, જ્યારે બાકીની રકમ સામાન્ય કોર્પોરેટ જરૂરિયાતો પૂરી કરવા માટે ફાળવવામાં આવશે.

ઓગસ્ટ ૨૦૨૬ સુધીમાં કંપની પર એકીકૃત ધોરણે રૂ. ૧૬,૭૮૧.૮ કરોડનું કુલ બાકી દેવું હતું. જોકે નાણાકીય કામગીરીની દ્રષ્ટિએ કંપનીએ મજબૂત વૃદ્ધિ દર્શાવી છે. માર્ચ ૨૦૨૬ માં પૂરા થયેલા નાણાકીય વર્ષમાં કંપનીનો નફો વધીને રૂ. ૩૦.૯ કરોડ થયો હતો, જે આગલા વર્ષે રૂ. ૧.૫ કરોડ હતો. આ જ સમયગાળા દરમિયાન કંપનીની કામગીરીમાંથી આવક રૂ. ૪૭.૨ કરોડથી વધીને રૂ. ૧૭૮.૧ કરોડ નોંધાઈ છે.

આઇનોક્સ ક્લીન એનર્જી ભારતીય બજારમાં ACME સોલર, અદાણી ગ્રીન એનર્જી, NTPC ગ્રીન એનર્જી, વારી એનર્જી અને JSW એનર્જી જેવી દિગ્ગજ લિસ્ટેડ કંપનીઓ સાથે સીધી સ્પર્ધા કરે છે. આ વિશાળ આઈપીઓનું સંચાલન કરવા માટે નુવામા વેલ્થ, ICICI સિક્યોરિટીઝ, JM ફાઇનાન્શિયલ, મોતીલાલ ઓસ્વાલ અને UBS સિક્યોરિટીઝ સહિતના દક્ષ મર્ચન્ટ બેન્કર્સની નિમણૂક કરવામાં આવી છે.