ચીનમાં સક્રિય થયું વિશ્વનું સૌથી મોટું 12.8 GWh બેટરી સ્ટોરેજ ક્લસ્ટર: AI ટેકનોલોજીથી સંચાલિત થશે ક્લીન એનર્જી

હરિત ઊર્જા અને પર્યાવરણ અનુકૂળ ટેકનોલોજીના ક્ષેત્રમાં ચીને એક નવો વિશ્વવિક્રમ સ્થાપિત કર્યો છે. ક્લીન એનર્જી ક્ષેત્રની અગ્રણી કંપની ‘એન્વિઝન ગ્રુપ’ (Envision Group) દ્વારા ઉત્તર ચીનમાં ૧૨.૮ ગીગાવોટ-કલાક (GWh) ક્ષમતા ધરાવતા વિશ્વના સૌથી મોટા બેટરી સ્ટોરેજ નેટવર્કમાં આર્ટિફિશિયલ ઇન્ટેલિજન્સ (AI) મેનેજમેન્ટ સિસ્ટમનું એકીકરણ સફળતાપૂર્વક પૂર્ણ કરી દેવામાં આવ્યું છે. આ નેટવર્કનો ૪ ગીગાવોટ-કલાક ક્ષમતા ધરાવતો મુખ્ય ફ્લેગશિપ પ્લાન્ટ હાલ વિશ્વની સૌથી મોટી ‘સિંગલ-સાઇટ ઇલેક્ટ્રોકેમિકલ એનર્જી સ્ટોરેજ ફેસિલિટી’ તરીકે ઉભરી આવ્યો છે.

આ સમગ્ર સ્ટોરેજ ક્લસ્ટરમાં રીઅલ-ટાઇમ ઓપરેશનલ નિર્ણયો અને ચાર્જિંગ-ડિસ્ચાર્જિંગ પ્રક્રિયાઓને આપમેળે સંચાલિત કરવા માટે બેટરી મેનેજમેન્ટ સિસ્ટમ્સમાં સીધા જ આર્ટિફિશિયલ ઇન્ટેલિજન્સ અને મશીન લર્નિંગ અલ્ગોરિધમ્સ લાગુ કરવામાં આવ્યા છે.

કંપનીના એન્જિનિયરોના જણાવ્યા અનુસાર, આ સિસ્ટમમાં સજ્જ એઆઈ સ્થાનિક વીજળીના સ્પોટ માર્કેટ સાથે સીધું ઇન્ટરફેસ કરે છે. તે લાઈવ ભાવ, પુરવઠાના વલણો અને માંગની સચોટ આગાહીઓનું પૃથ્થકરણ કરીને વીજ વિતરણના શિડ્યુલને ઓપ્ટોમાઈઝ કરે છે. પરંપરાગત ફિક્સ્ડ-શેડ્યૂલ સ્ટોરેજ પ્લાન્ટ્સની સરખામણીમાં આ આગાહીયુક્ત સોફ્ટવેર આર્કિટેક્ચર પ્લાન્ટની આજીવન આવકમાં આશરે ૨૦ ટકા સુધીનો વધારો કરશે.

આ સિસ્ટમ બેટરી સેલના થર્મલ તાપમાન અને વર્તણૂકનું સતત નિરીક્ષણ કરે છે. ‘એન્વિઝન જિંગી ચાગન હાડા એનર્જી સ્ટોરેજ પાવર સ્ટેશન’ કડક ગ્રીડ ચકાસણી પરીક્ષણોમાંથી પસાર થઈને સંપૂર્ણ વાણિજ્યિક કામગીરી પર પહોંચી ગયું છે. ઇનર મંગોલિયાના થીજવી દેતા શિયાળાના તાપમાન વચ્ચે પણ આ ફેસિલિટીએ પોતાના પ્રારંભિક પ્રયાસમાં સતત ૭૨ કલાકનો ટ્રાયલ રન સફળતાપૂર્વક પૂર્ણ કર્યો હતો.

ચાગન હાડા પ્લાન્ટ પ્રદેશના મુખ્ય ઉર્જા ઉત્પાદન કેન્દ્રો જેવા કે બાયન્નુર, ઓર્ડોસ, હોહોટ, ઉલાનકાબ, ઝિલિંગોલ અને અલ્ક્સા લીગ માટે કેન્દ્રીય એન્કર તરીકે સેવા આપશે. આ નવા જોડાણ સાથે જ ઇનર મંગોલિયામાં એન્વિઝનનું કુલ કાર્યકારી ઉર્જા સંગ્રહ પદચિહ્ન ૧૪ ગીગાવોટ-કલાકથી વધુ થઈ ગયું છે.

ઇનર મંગોલિયા પ્રદેશ પ્રચંડ પવન અને સૌર ઉર્જા ઉત્પન્ન કરે છે, જે ઘણીવાર સ્થાનિક ગ્રીડ ક્ષમતા કરતાં વધી જાય છે. આ વિશાળ બેટરી ક્લસ્ટરો દિવસ દરમિયાન ઉત્પાદિત થતી વધારાની વીજળીને શોષી લેશે અને પીક અવર્સ દરમિયાન તેનો પુરવઠો ગ્રીડમાં છોડશે. આનાથી વીજળીનો બગાડ અટકશે અને પૂર્વ ચીનના મોટા શહેરોને વીજળી પહોંચાડતા લાંબા અંતરના અલ્ટ્રા-હાઇ-વોલ્ટેજ ટ્રાન્સમિશન કોરિડોરને ચોવીસે કલાક સ્થિરતા મળશે.

યુટિલિટી-સ્કેલ સ્ટોરેજ ઇન્ફ્રાસ્ટ્રક્ચર હવે માત્ર ગ્રીડ સપોર્ટ પૂરતું મર્યાદિત ન રહેતા સીધા જ ઔદ્યોગિક અને હાઇ-ટેક કમ્પ્યુટિંગ ક્ષેત્રને પાવર સપ્લાય કરી રહ્યું છે. એન્વિઝને ઉલાનકાબ ખાતે પોતાના ‘ગેલેક્સી કેમ્પસ’ ની પણ શરૂઆત કરી છે, જે ૨-ગીગાવોટનો ગ્રીન એનર્જી AI કમ્પ્યુટિંગ ઇન્ડસ્ટ્રિયલ પાર્ક છે.

આ વિશાળ ડેટા સેન્ટર ૧૦ લાખ એઆઈ એક્સિલરેટરને સપોર્ટ કરવા માટે ડિઝાઇન કરાયું છે. આ ડેટા સેન્ટર પરિસર પવન ફાર્મ અને ૧૨.૮ GWh બેટરી સ્ટોરેજ ક્લસ્ટર પાસેથી સીધી વીજળી મેળવીને સંપૂર્ણપણે શૂન્ય-કાર્બન (Zero-Carbon) ઉત્સર્જન સાથે ચોવીસે કલાક કાર્યરત રહેશે. આ પ્રોજેક્ટ વૈશ્વિક ક્લીન-ટેક ક્ષેત્રે એક નવો માઇલસ્ટોન સાબિત થશે.