અવાડા ઇલેક્ટ્રો વિક્રમ સોલારને G12R-આધારિત સોલાર સેલ સપ્લાય કરશે, ₹૧,૨૫૦ કરોડના કરાર પર હસ્તાક્ષર
ભારતના રિન્યુએબલ એનર્જી ક્ષેત્રમાં સપ્લાય ચેઈનને વધુ મજબૂત બનાવવાની દિશામાં એક મોટો અને વ્યૂહાત્મક કરાર સંપન્ન થયો છે. અવાડા ગ્રુપની ઉત્પાદન શાખા અવાડા ઇલેક્ટ્રો (Avaada Electro) અને વિક્રમ સોલાર (Vikram Solar) વચ્ચે 1 GW ALMM-અનુરૂપ, સ્થાનિક રીતે ઉત્પાદિત N-ટાઇપ G12R TOPCon સોલાર સેલના પુરવઠા માટે કરાર પર હસ્તાક્ષર કરવામાં આવ્યા છે.
એક પ્રેસ રિલીઝ મારફતે માહિતી આપતા વિક્રમ સોલારે જણાવ્યું હતું કે દેશની વધતી જતી ડોમેસ્ટિક કન્ટેન્ટ રિક્વાયરમેન્ટ (DCR) ની જરૂરિયાતોને પૂર્ણ કરવા અને ઉત્પાદન કાર્યરત રાખવા માટે આ કરાર કરવામાં આવ્યો છે. કરાર મુજબ, વિક્રમ સોલાર આશરે રૂ. ૧,૨૫૦ કરોડના મૂલ્યના અર્ધ-કટ (Half-Cut) N-Type G12R TOPCon સોલાર સેલ અવાડા ઇલેક્ટ્રો પાસેથી ખરીદશે. આ સપ્લાયની ડિલિવરી સપ્ટેમ્બર ૨૦૨૬થી શરૂ થવાની યોજના છે.
ઉત્પાદન વ્યૂહરચના અને બજારનો નવો ટ્રેન્ડ
આ કરાર એવા સમયે સામે આવ્યો છે જ્યારે વિક્રમ સોલારે અગાઉ તમિલનાડુ ખાતેથી પોતાનું સોલાર સેલ ઉત્પાદન શરૂ કરવાની યોજના બનાવી હતી. જોકે, આ કરાર બાદ કંપની હવે પોતાના સોલાર મોડ્યુલ બનાવવા માટે અવાડા ગ્રુપના પુરવઠા પર આધાર રાખશે.
હાલમાં ભારતની એવી ઘણી કંપનીઓ જેમણે હજુ સુધી પોતાનું સોલાર સેલ ઉત્પાદન શરૂ કર્યું નથી, તેઓ સરકારી DCR આદેશ અને નીતિઓ સાથે બજારમાં ટકી રહેવા માટે દેશના અન્ય સ્થાપિત સોલાર સેલ ઉત્પાદકો પર નિર્ભર રહી રહી છે. સોલાર સેક્ટર ક્ષેત્રે આ પ્રકારની વ્યવસ્થા હવે ઉદ્યોગમાં વધુ ને વધુ લોકપ્રિય બની રહી છે.
ઉચ્ચ ટેકનોલોજી અને અવાડા ઇલેક્ટ્રોની ક્ષમતા
સોલાર પીવી સેલ માટે મંજૂર કરાયેલા મોડેલ્સ અને ઉત્પાદકોની યાદી (ALMM-II) ના નવીનતમ સુધારાઓ અનુસાર, અવાડા ઇલેક્ટ્રો એ દેશની એવી જૂજ કંપનીઓમાંની એક છે જેણે પોતાના પોર્ટફોલિયોને મોટા-ફોર્મેટ G12R N-ટાઇપ TOPCon ટેકનોલોજી તરફ આગળ વધાર્યો છે.
અવાડાએ પોતાના સેલ પોર્ટફોલિયોને G12 18-બસબારથી વિસ્તારીને G12R 16-બસબાર વેરિઅન્ટ સુધી પહોંચાડ્યો છે. કંપનીની નવીનતમ પ્રોડક્ટ સૂચિમાં ૨૫.૮૩% ની સરેરાશ કાર્યક્ષમતા ધરાવતો N-G12R-16B-HC-AVA હાફ-કટ સેલ અને ૨૫.૭૧% ની કાર્યક્ષમતા ધરાવતો N-G12R-16B-FC-AVA ફુલ-સેલ વેરિઅન્ટ સમાવિષ્ટ છે.
ઉલ્લેખનીય છે કે, અવાડા ઇલેક્ટ્રોએ ૨૨ જુલાઈ, ૨૦૨૬ ના રોજ ALMM યાદીમાં પ્રવેશ કર્યો હતો. મહારાષ્ટ્રના નાગપુર (બુટીબોરી) ખાતે તેની ૬૧૦ MW પ્રતિ-વાર્ષિક ક્ષમતા ધરાવતી સુવિધા નોંધાઈ હતી. કંપનીએ નાગપુર પ્લાન્ટ ખાતે પોતાની 6 GW N-Type TOPCon સોલર સેલ ઉત્પાદન સુવિધા સ્થાપવાની યોજના આગળ ધપાવી છે, જે પૈકી પ્રથમ 3 GW ની ઉત્પાદન લાઈન કાર્યરત થઈ ચૂકી છે.
વિક્રમ સોલારની વિસ્તરણ યોજના
આ કરાર વિક્રમ સોલાર માટે તેના સેલ સપ્લાય ચેઈનનું વૈવિધ્યીકરણ કરવા અને DCR બજારમાં પોતાની પકડ મજબૂત કરવાની વ્યૂહરચનાનો ભાગ છે. આ કરાર કંપનીની 9 GW ની નવી હાઈ-એફિશિયન્સી સોલાર સેલ મેન્યુફેક્ચરિંગ ફેસિલિટીને પૂરક બનાવશે, જે નાણાકીય વર્ષ ૨૦૨૭ ના ચોથા ક્વાર્ટરમાં કાર્યરત થવાની ધારણા છે.
આ ભાગીદારી અંગે વાત કરતા વિક્રમ સોલારના ચેરમેન અને મેનેજિંગ ડિરેક્ટર જ્ઞાનેશ ચૌધરીએ જણાવ્યું હતું કે, “ભારતના સોલાર વિકાસનો આગામી તબક્કો માત્ર ઉત્પાદનના સ્કેલ પર જ નહીં પરંતુ સપ્લાય ચેઈનની ઊંડાઈ પર નક્કી થશે. આ વ્યવસ્થા અમારા સપ્લાયર બેઝને વિસ્તૃત કરે છે અને ભારતની ઊર્જા સુરક્ષા માટે આત્મવિશ્વાસ પૂરો પાડે છે. આત્મનિર્ભર ભારતનું નિર્માણ સતત આવી સકારાત્મક ભાગીદારીઓ દ્વારા જ શક્ય બનશે.”
