સોલાર ક્ષેત્રે વિદેશી ધરતી પર મોટું રોકાણ: જાણો કઈ કંપનીની ભાગીદારીથી મળશે સેંકડો લોકોને રોજગારી!
ગામીણ વિસ્તારોમાં લાંબા ગાળાના આર્થિક વિકાસ અને ઊર્જા ક્ષેત્રે ક્રાંતિ લાવવાના ઉદ્દેશ્ય સાથે ‘વેલિનોર ઇન્વેસ્ટમેન્ટ્સ લિમિટેડ’ (Valinor Investments Limited) એ ઝામ્બિયાના પશ્ચિમ પ્રાંતના મ્વાન્ડી જિલ્લામાં $8 મિલિયન (અંદાજે ₹66 કરોડથી વધુ) ના સોલાર ફોટોવોલ્ટેઇક પ્રોજેક્ટનું નિર્માણ કાર્ય સત્તાવાર રીતે શરૂ કરી દીધું છે. વેલિનોર ઇન્વેસ્ટમેન્ટ્સ એ ‘થેબે ઇન્વેસ્ટમેન્ટ મેનેજમેન્ટ લિમિટેડ’ની રૂલર ઇન્વેસ્ટમેન્ટ પાંખ છે. આ પ્રોજેક્ટ ‘એક્ઝર્જી એનર્જી લિમિટેડ’ની પેટા કંપની ‘લુન્ઝુઆ પાવર કંપની લિમિટેડ’ સાથેની ભાગીદારીમાં વિકસાવવામાં આવી રહ્યો છે. વેલિનોર માટે એનર્જી સેક્ટરમાં આ સૌથી પહેલું અને મહત્વપૂર્ણ રોકાણ છે.
પ્રોજેક્ટનું માળખું અને ફાઇનાન્સિંગ મોડેલ
આ સોલાર પ્રોજેક્ટ કુલ 20 MW (મેગાવોટ) નો સંયુક્ત વિકાસ પ્રોજેક્ટ તરીકે આયોજિત કરવામાં આવ્યો છે, જેમાંથી પ્રથમ તબક્કામાં 10 MW નો પાવર પ્લાન્ટ તૈયાર કરવામાં આવશે. આ ફેસિલિટી દ્વારા ઉત્પાદિત થનારી પુનઃપ્રાપ્ય વીજળી ઝામ્બિયાના નેશનલ ગ્રીડને સપ્લાય કરવામાં આવશે, જેનું સંચાલન રાષ્ટ્રીય વીજ કંપની ZESCO દ્વારા થાય છે.
વેલિનોર અને લુન્ઝુઆ પાવર દ્વારા આ $8 મિલિયનના પ્રોજેક્ટ માટે 30:70 નું ઇક્વિટી-ટુ-ડેટ (Equity-to-Debt) ફાઇનાન્સિંગ માળખું અપનાવવામાં આવ્યું છે. આ ફંડિંગમાંથી માત્ર સોલાર પ્લાન્ટનું નિર્માણ જ નહીં, પરંતુ પ્લાન્ટને નેશનલ ગ્રીડ સાથે જોડવા માટે જરૂરી એવી ખાસ ઇવેક્યુએશન પાવર લાઇન (Evacuation Power Line) પણ તૈયાર કરવામાં આવશે.
બાંધકામ અને સમયસીમા: SANY ઈન્ટરનેશનલને સોંપાઈ જવાબદારી
આ પ્રોજેક્ટ માટે મુખ્ય કોન્ટ્રાક્ટર તરીકે ‘SANY ઈન્ટરનેશનલ (ઝામ્બિયા) ઈન્ડસ્ટ્રીયલ કંપની લિમિટેડ’ ની પસંદગી કરવામાં આવી છે. મ્વાન્ડી જિલ્લાના મ્વિલિમા વિસ્તારમાં આવેલી 40 હેક્ટર જમીન પર પ્રોજેક્ટનું ગ્રાઉન્ડબ્રેકિંગ (ભૂમિપૂજન) પૂર્ણ થઈ ચૂક્યું છે અને ગ્રાઉન્ડ લેવલ પર એન્જિનિયરિંગ ટીમો તૈનાત કરી દેવામાં આવી છે.
બાંધકામનો સમયગાળો આશરે 6 મહિનાનો રાખવામાં આવ્યો છે. પ્રથમ તબક્કાનું નિર્માણ કાર્ય જાન્યુઆરી 2027 સુધીમાં પૂર્ણ કરવાનું લક્ષ્ય નિર્ધારિત કરવામાં આવ્યું છે.
ઉત્પાદન ક્ષમતા અને 4,600 પરિવારોને મળશે વીજળી
પ્રથમ તબક્કો પૂર્ણ થયા બાદ, આ પ્લાન્ટની સ્થાપિત ક્ષમતા ડાયરેક્ટ-કરન્ટ (DC) બાજુએ 11 MWp અને અલ્ટરનેટિંગ-કરન્ટ (AC) બાજુએ 10 MWac હશે. આ ફેસિલિટી વાર્ષિક આશરે 22 GWh (ગીગાવોટ અવર્સ) ગ્રીન વીજળીનું ઉત્પાદન કરશે તેવી ધારણા છે.
પ્રોજેક્ટ ડેવલપર્સના જણાવ્યા અનુસાર, આટલી ઉત્પાદન ક્ષમતાથી આસપાસના વિસ્તારના આશરે 4,600 ઘરોની વીજળીની દૈનિક જરૂરિયાતો પૂરી કરી શકાશે. આ ઉપરાંત, આસપાસના ગ્રામીણ વિસ્તારોમાં ચાલતા ના નાના-મોટા ઉદ્યોગો અને કોમર્શિયલ ગ્રાહકોને પણ સતત વીજ પુરવઠો મળી રહેશે.
સ્થાનિક રોજગારી અને ગ્રામીણ આર્થિક વિકાસ
આ પ્રોજેક્ટ માત્ર વીજ ઉત્પાદન પૂરતો સીમિત નથી, પરંતુ તે સ્થાનિક સમુદાય માટે આર્થિક સમૃદ્ધિનો માર્ગ પણ ખોલશે. બાંધકામ તબક્કા દરમિયાન સ્થાનિક સ્તરે આશરે 100 જેટલી નવી રોજગારીની તકો ઊભી થશે. પ્લાન્ટ કાર્યરત થયા બાદ તેના ઓપરેશન અને મેન્ટેનન્સ (O&M) માટે અન્ય કાયમી જગ્યાઓ પર સ્થાનિક યુવાનોને રોજગારી આપવામાં આવશે.
વેલિનોર ઇન્વેસ્ટમેન્ટ્સની વ્યૂહરચના ઝામ્બિયાના પછાત અને ગ્રામીણ વિસ્તારોમાં લાંબા ગાળાની મૂડી રોકવાની છે. મ્વાન્ડી જેવા પ્રદેશમાં સોલાર એનર્જી ઈન્ફ્રાસ્ટ્રક્ચર ઊભું કરીને કંપની સ્થાનિક કુદરતી સંસાધનોનો સદુપયોગ કરી રહી છે, જે પ્રદેશના આર્થિક અને સામાજિક ચિત્રને બદલવામાં મદદરૂપ થશે.
